ئەڤ کەلە دکەڤیتە ۱۸ کیلومەتریا باشورێ شارێ ئورمیێ، دوو کیلومەترا ل باشورێ گوندێ (بالانج) و ۸ کیلومەترا ل دەریاچا ئورمیێ دوورە. روبەرێ کەلا دمدم ٤٠ دونەم یان سەد هەزار مترێن چوار گوشەیە و دورماندورێ وێ نێزیکی ۱٥٠٠ مەترایە، لسەر ئەردێن دەوروبەرێن خۆ ۷٠ مەتران بلندترە، ۱٤٥٠ مەتران لسەر ئاستێ دەریایێ یا بلندە.هەردوو رەخێن باکور و باشور بەرەکێ ئاسێیە و بتێ ژلایێ رۆژهەلات و رۆژئاڤا ڕێ دچیتێ، کو ئەو ژی ب دیوارێن موکم و بلند و ب بورجان هاتبوو ئاسێ کرن. نها ژ ئالیێ روژئاڤا کەلێ، دیوارێن بەری ب بلنداییا میترەکێ ماینە د جهدا. زەرەرکا زور د ئەنجامێن شەراندا گەهشتینە ڤێ کەلێ.
ئەڤ کەلە بۆ سەردەمێ ئورارتیان (۸٦٠ ــ ٥۹٠ پ. ز) د زڤریتەڤە، ل دەستپێکا سەدێ هەڤدێ ژلایێ ئەمیر خانێ برادوست یێ ناڤدار ب خانێ لەپ زێرین ڤە، کەلەکا نوو لسەر جهێ کەلا کەڤن هاتە ئاڤاکرن. ئەڤ کەلە ل تشرینا دووێ سالا ۱٦٠۹ تا تەموزا ۱٦۱٠ ژلایێ مەزنترین لەشکرێ شاە عەباسێ سەفەوی (۱٥٠۱ ــ ۱۷۳٦) ب سەرکردایەتیا حاتەم بەگێ ئوردوبادی ئیعتمادودولە ئانکو سەروک وەزیران ڤە هاتە دورپێچکرن و پاش بەرخودانەکا مێرانەیا کوردان ژێر سەرکردایەتیا ئەمیر خانێ لەپ زێرین و عەبدال خانێ کورێ میرە پاشایێ موکریان، سەرەنجام ل دووماهیا حوزەیرانا ۱٦۱٠ کەلا دمدم هاتەگرتن و کورد هاتنە قەتلوعام کرن.
جارەکا دیتر ئولوغ بەگێ برادوست ل سالا ۱٦۱٥ ئەڤ کەلە ب هاریکاریا (پەریزاد خانما) ژنا ئەمیر خانێ لەپ زێرین گرتەڤە، لێ د ئەنجامێ تەقینا بارۆتخانا کەلێ، جارەکا دیتر کەلا دمدم کەفتە د دەستێن لەشکرێ عەجەماندا.
دووماهی جار پاش تورککرنا ئورمیێ (کەلب عەلی خانێ ئەفشار ) دەسەلاتدارێ ئورمیێ سالا ۱٦۲۸ ئەڤ کەلە پشتی ژ دەستێ تەمەر خانێ کورێ خانێ لەپ زێرین ئینایە دەر، وێران کر.
نها ئەڤ کەلە ژلایێ ڕێڤەبەریا پاراستنا شوێنەوارێن نەتەوەیی ل ئیرانێ ب ژمارە ۳۱۱۷۳ هاتیە تومارکرن.
وەرگیراوە لە
پ.د.عەلی تەتەر نێروەیی: ئەمیر خانێ لەپ زێرین و کەلا دمدم دناڤبەرا مێژوو و ئەفسانێدا، دەزگەها سپیرێز ، (دهوک ، ۲٠۱۸)
